Aquí mos tiens de nuebo, un lumero más espardindo o nuestro patrimonio cultural.
Tenemos a gran suerte de bibir en una comunidá rica en tresoros d’ista mena, tresoros que muitas bezes no son bien conoxius y muitas atras no son cusiratos como caldría.
Be estar que l’agradeximiento ta con os nuestros debanpasatos ye una birtú que se i ye perdendo.
En iste lumero emos treballau firme ta que as tres probinzias d’Aragón se sientan representadas y deseyamos que ista seiga a nota abitual en a nuestra publicazión. Por ista enchaquia amanixen articlos de l’Alto Galligo, por Uesca, Tarazona y Moncayo y Zinco Billas (Bal d’Onsella), por Zaragoza, Matarranya, Andorra-Sierra d’Arcos y Gúdar-Eixabalambre, por Teruel. Ambista se define como una rebista aragonesa y Aragón ye muito amplo, anque a bezes el xublidemos.
L’aragonés ye estau y continará estando a nuestra luenga de treballo por ixo emos creyito combenién informar sobre l’Academia d’Aragonés y mos imple d’argüello contar con a partizipazión d’o suyo presidén, Manuel Castán. Asinas mesmo, l’abiento pasau se cumplioron diez añadas d’a emisión d’o primer y unico pograma de telebisión que se emite de raso en aragonés: Chino-Chano, una iniziatiba de CREABA y a TB local d’Andorra que grazias á Internet podemos desfrutar toz os aragoneses. Teruel tamién esiste… en aragonés.
En a demba d’etnolochía charraremos de l’Asociación Cultural «Sesayo» de Lobera d’Onsella, una entidá con más de doszientos sozios que treballa firme por a recuperazión d’o patrimonio (fuen d’o Sesayo), d’o folclore (Rito d’os esbinzaus, rechistrau por Eugenio Monesma) y en a promozión d’a cultura popular (teyatro en a carrera, esposizions de pintura, ezetra). Un exemplo d’esfuerzo y dedicazión que merixe o nuestro particular omenache dende istas fuellas.
Quiesto leutor, un lumero más desfruta Ambista
Sin comentarios